PREMIOS MANUEL BEIRAS

Os premios Manuel Beiras teñen como obxectivo recoñecer o esforzo que fan as empresas de Compostela na normalización do uso da lingua galega. Convócanse anualmente, e desde o ano 2000, polo Concello de Santiago de Compostela e a Cámara de Comercio.

Nesta edición traballouse primeiramente a imaxe dos premios. Ata agora empregábase o perfil de Manuel Beiras, pero non tiña unha tipografía asociada nin un tratamento uniforme.

No que se refire á convocatoria, nesta edición quixemos poñer o foco na persoa que dá nome aos premios: Manuel Beiras. Foi un intelectual e político galeguista. Aos dezaseis anos publicou o seu primeiro artigo xornalístico no Diario de Galicia e posteriormente seguiu escribindo e traducindo ao galego baixo o pseudónimo “Eu ben sei”.

Este pseudónimo inspirounos para crear unha campaña de intriga, na que coa súa imaxe e a pregunta “Que é o que importa?”, quixemos provocar unha reflexión ao redor do realmente importante no mundo da cultura e da lingua.

Como desenlace, e acompañando as bases do premio, un cartel presenta a imaxe de campaña cun “Ti ben sabes”, que nos responde que todos sabemos que o importante do noso idioma é utilizalo. Así faciamos unha chiscadela ademais ao pseudónimo de Manuel Beiras.